一条金色的光痕|徐志摩

· 词句 ·
  (硖石土白)   得罪那,问声点看,   我要来求见徐家格拉太太,有点事体……   认真则,格拉就是太太,真是老太婆哩,   眼睛赤花,连太太都勿认得哩!   是欧,太太,今朝特为打乡下来欧,   乌青青就出门;田里西北风度来野欧,是欧,   太太,为点事体要来求求太太呀!   太太,我拉埭上,东横头,有个老阿太,   姓李,亲丁末……老早死完哩,伊拉格大官   官——   李三官,起先到街上来做长年欧——早几年   成了弱病,田末卖掉,病末始终勿曾好;   格位李家阿太老年格运气真勿好,全靠   场头上东帮帮,西讨讨,吃一口白饭,   每年只有一件绝薄欧棉袄靠过冬欧,   上个月听得话李家阿太流火病发,   前夜子西北风起,我野冻得瑟瑟叫抖,   我心里想李家阿太勿晓得那介哩,   昨日子我一早走到伊屋里,真是罪过!   老阿太已经去哩,冷冰冰欧滚在稻草里,   野勿晓得几时脱气欧,野呒不人晓得!   我野呒不法子,只好去喊拢几个人来,   有人话是饿煞欧,有人话是冻煞欧,   我看一半是老病,西北风野作兴有点欧;——   为此我到街上来,善堂里格位老爷   本里一具棺材,我乘便来求求太太,   做做好事,我晓得太太是顶善心欧,   顶好有旧衣裳本格件把,我还想去   买一刀锭箔;我自己屋里野是滑白欧,   我只有五升米烧顿饭本两个帮忙欧吃,   伊拉抬了材,外加收作,饭总要吃一顿欧,   太太是勿是?……嗳,是欧!嗳,是欧!   喔唷,太太认真好来,真体恤我拉穷人……   格套衣裳正好……喔唷,害太太还要   难为洋钿……喔唷,喔唷……我只得   朝太太磕一个响头,代故世欧谢谢!   喔唷,那末真真多谢,真欧,太太……